西貢勝記海鮮酒家 - 名不虛傳，米芝連級海鮮酒家 (上)

話說，我的同事雖然大家已經日日都見。但是我們每月都總會安排一晚，一班同事到不同的酒樓館子，品嚐不同的美食。而今次是大家已經熱烈地討論了一段時間的海鮮餐。

其實要嚐海鮮餐，已經是年初的提議。但由於時間和地點未有共識，而一再推遲。今次正好大伙兒出了獎金，為了好好回報自己過去的辛勤努力 (老實說，也不是太辛苦)。同事們都很積極安排這次活動。

香港出名食海鮮的地方，不外乎，屯門三聖、油塘的鯉魚門、南丫島和今次的目的地 - 西貢。

由於要好好慰勞一下自己，同事就選擇了西貢勝記海鮮酒家，因為剛在2013年成為米芝連級的酒家，同事話一定要去試一試。

當日放工，就急急腳走人，乘轉車由中環出發，大約都要50分鐘的車程 (由馬鞍山入經西沙公路)。在正門落車，酒家位於避風塘那邊，如果由西貢大街行入去，就要大約5至10分鐘。

由於我地係星期五用餐的關係，所以我地早就晌一星期前已訂好位。報上姓名，酒家職員立即安排的座位。當晚一行六人，被安排入座一張可坐十人的枱，所以都坐得幾舒服，好適合我呢類大肥佬。(重點：想幫襯最好訂定枱，另外樓上廂房設最低消費，訂枱時記得問清楚)

西貢勝記

單邊設計，廂房可飽覽避風塘景色

食海鮮，自己去揀下材料就最開心既，見到啲新鮮海產，真係心大心細，咩都想試下呀。佢地都有自己既魚缸，所有大路既野都有呀。

花多眼亂

新鮮鮑魚，點整好呢?

大大隻紅蟹，愛好者真係唔捨得走呀

哈、哈、蝦

經過左一陣心大心細既討論之後，最後就選左瀨尿蝦，貴妃蚌、龍蝦、蟶子皇、一條海斑、同埋桶蠔，成為左我地果晚既美味菜餚。而點樣煮呢，我地呢啲行外人就係叫人地推介下啦，跟住就乖乖地等食。

對於一班為食既人黎講，等食係好辛苦呀。所以呢, 我地多口問下，仲有冇咩好野推介啦。(要食好野，厚面皮真係必須呀。) 伙計就話一定要試下佢地既炸手打墨魚餅，同是晚既梭羅魚湯喎。

傾左一陣計，梭羅魚湯上場喇 (可惜冇影相)。初時，第一時以為係西式忌廉湯咁，試左一小啖，嘩，唔腥就好鮮添。跟住就大大啖飲，真係好正，下次有機會試下自己煲先。

飲完湯，小食跟住上場。炸手打墨魚餅出場喇，負責上菜位姐姐仲好有心咁，提我地小心熱，唔好 " 辣 " 親個咀。

其實叫墨魚波可能仲開心啲

墨魚餅成個乒乓波咁，熱辣辣，整個係金黃色，唔係炸定等人要。墨魚膠味道調得剛剛好，本留墨魚既鮮味，但又唔會太實，太油膩。呢個冇推介錯。

跟住海鮮陸續登場，首先就係瀨尿蝦喇。由於我地人唔多，加上一隻瀨尿蝦都幾大隻 (有我前臂咁長) ，所以我地就要左三隻，為左惹味啲，我地就揀左黎做椒鹽瀨尿蝦。

後悔當初唔要幾隻，一人一隻都過份呀

椒鹽真係好惹味，伙計端出餸菜時。香味四溢，蝦身炸得金黃色，未食都已經猛吞口水。唔似一般既做法，椒鹽薄薄咁包住隻蝦，再炸。雖然經過油炸，但係蝦唔好乾身，廚師工夫可見一班。

係唔係好好味呢，好喇，寫住咁多先，下回待續 ... ...